Yaad Wo Aaya Hai Barsaat Mein Baadal Ki Tarah


Yaad Wo Aaya Hai Barsaat Mein Baadal Ki Tarah,
Baat Karne Mein Chahakta Tha Jo Koyal Ki Tarah.

Zeest Apni Thi Sulagte Hue Jungal Ki Tarah,
Dil Hara Kar Diya Uss Zulf ne Baadal KI Tarah.

Ya To Milna Hi Muqaddar Mein Nahi Tha Unse,
Ya Muqaddar Ka Likha Mit Gaya Kaajal Ki Tarah.

Hum Ke Insaan Hain , Ashraf Bhi Hain Lekin Afsos,
Jaan Khapakar Ke Bhi Ho Paye Na Peepal Ki Tarah.

Dhal Gaya Husn-o-Shabab Uska, To Woh Bhi Hai Aaj,
Ek Maikhaar Ki Tooti Huee Botal Ki Tarah.

Ahl-e-Zarf Ab Bhi Isi Zid Pe Ade Hain Yaaro,
Sona Sasta Nahi Hota Kabhi Peetal Ki Tarah.

Aasteeno mai Pale Naag To Daste The Magar,
Ahle Qirdar Mahakte Rahe Sandal Ki Tarah.

Jaam-o-Sahba Hai Na Ronaq Hai Na Ushshaq Ki Bheed,
Aaj Sooni He Teri Bazm Bhi Maqtal Ki Tarah.

Hum Ke Tanha The Har Ik Mod Pe Tanha Hi Rahe,
Sar Se Uthte Gaye Sab Aasre Aanchal Ki Tarah.

Josh-o-Masti Hai Na Wo Walwale, Na Lutf-e-Hayaat
Rekhta Dil bhi Hai Veeraan Kisi Jungal Ki Tarah.